| Uitspraak tussen de Proost van Werden en enige Ingezetenen op Veluwe 24 April 1368
Wy Clawes van den Steyne Praest te Werden doen kont allen lieden mit desen apene brive dat wy ghelouet hebben eenre sceydinghe als eersommen luden dye hier nae bescreuen staen Her Herbert van Putten [,] Her Bernt van den Dorenweert Ridder[,] Her Henrick Mumme Priester[,] Arnt van der Lawyc Richter van Velue in der tyt[,] Johan van der Lawyc[,] Clawes en Dyderic van Aller gebruder en de Henric van Herwen als tusschen ons ende onse luden ende mede die ghenen dye dy goede onder hebben sy sien ons horich ofte niet daer dye meeste hoep voer ons gheweset hebben ende mede seyden dat si voer dye ander goet wesen wouden als van onsen rogghe dye si ons jaerlix te gheuen pleghen ende Hekede, Ael, Herinck, Verken of Weder daer wy Praest voern. in die Praestie langher dan viertich jaer ghebreckelic afghewesen hebben alsoe dat wy seggher voerscreven segghen, dat Gerrit Scoutman, dye erfgenamen van den goede toe Ermel, Bernde Craken van Haluinchusen, Abel Sliten, Heynen van Husser, Coep Witlinck, Everaert van Boedecamp, Wouter van Rimpelaer, Werneer Slikenberch, Bertraet Wolfssoen, Geraert van Hosle, Johan Melissoen van den Meden, Gheraert van Spulde, Willem van Dolre, Geraert ver Hadewyghesoen, Henric Dydericsoen en syn brueder, Henric Hermanssoen, Nanneman van Haluinchuesen, des onbehouwes wijf en oer Kindere, Goswyn van Daslaer, Arnt dye Gansenaer, Aliet tsboumans wyf, Clawes Noudensoen, Lubbe van Holdorp, Wolf van Strude, Otten dyen Wysen, Jacob van Douerden, Reynier Bollen, Clawes Hellinc, Germaen Lysghers Süager, Arnt van der Molen, Ghysen van Bechorst, Sladerman Ghysen Croenen, Tyden Haelboem, Craker Janssoen, Arnd Dolensoen, Alaert dye Snider, Minse van Sprile, Scaegher van Erke, Bessel Oseken, Alaert Nouden Hubbensoen, Egbaert Hetman, Aliet ende Bessel van Noerden, Wyneken Craken, Jan Thunis, Arnt Besselssoen, Noude Wellensoen ende Wyneken Hillensoen jaerlix soelen gheven ende betaelen dye ter tyt dier betalinghe Praest is, twee ende dertich mouder rogghen al sulker maten als in sinen haue hier toegewoenlyc te betaelen gheweset heuet nae heltenisse synre scoutboec elcman dye de goede onder hebben sien groete daer af ende soe wye dat een mouder rogghen gheuet, gheuen sal enen groeten erffelyc nae syn beloep, soe mennich mouder alsoe menighen groeten ende alle jaer te betalen op Sunte Geertrueds dach in den Meerte als voer die Hekede, Ael Herinck, Weder ofte Verken. Ende daer mede soe soelen dese voersc., si en horich of niet ghesceyden wesen toe desen daghe toe. Voert so segghen dese seggher dat dese vier dye hier nae bescreuen staen als Lubbert Janssoen van Wessingghen, Egbert Vaken te Wessingghen, Dyderic Keseken, Lambaert van Westen gheuen soelen dien Praest voersc. alle jaer op Sunte Mertens daghe in den wynter in den Hof te Putten voer Hekede, Ael, Herinck, elkerlyk van den vieren drie groete paymeynt als in der tyt genghe is ende ghene ende daer mede soelen si ghesceyden wesen toe desen daghe toe van Hekede, Ael, Herinck voersc. ende soelen dier Praestien voertan gheuen alsuhlcke ghulde alsi anders sien sculdich nae heldenisse oere scoutboec. Ende hier waren auer ende aen als eersomme sceytslude dye voersc. staen Her Herbert, Her Bernt Ridder, Her Henric, Arnt, Johan, Clawes, Dyderic ende Henric. In desen voerwaerde alle ergelyst uyt gheseyt. Ende dat is te weten dat deser briue twee sien daer dye ene af heuet dye Praest voergen. aen dye ene syde ende dye ander paert dien anderen aen dye ander syde van woerde te woerde alleyns sprekende. In orconde ende vestenisse deser ghelossenisse ende sceydinghe, soe hebbe wy Clawes van den Steyne voerghen. onsen seghel aen desen bryf ghehanghen ende omme dye meere waerheyt ende sekerheyt wille soe hebbe wy Clawes voerghen. ghebeden Heren Herbert van Putten ende Heren Bernt van den Dorenweert Ridder, Arnt van der Lawyc Richter van Velue in der tyt, Johan van der Lawyc, Clawes en Dyderic van Aller en Henrik van Herwen dat si oer seghele mede aen desen bryf hanghen wyllen. Ende wy seggher voergen. Her Herbert, Her Bernt, Arnt, Johan, Clawes, Dyderic ende Henric omme bede wille Heren Clawes van den Steyn, Praest van Werden voerghen. aen dye ene syde ende omme bede wille dyer ander partien aen dye ander syde, soe hebbe wy onse seghele aen desen brief ghehangen int Jaer ons Heren MCCC acht ende sestich des Sonnendaghes als men singet Miseericordias Domini. Alle zegelen van deien brief zyn gaaf, uitgenome dat van Clawes van Aller t welk afgevallen is. Ex Autographo in Arch. Abbadiae Abdinghof Capsa B. No. 2. -0- Bron: Willem Anne van Spaen, Oordeelkundige inleiding tot de historie van Gelderland (1795), deel 4, Codex Diplomaticus. |
Terug naar: Lijsten geestelijke goederen.
Gemaakt: Zaterdag 1 december 2001.
Copyright©OGR
odeeby 